Helpwch i lunio glan yr afon Castell Aberteifi fel rhan o gynllun llifogydd
Mae ymgynghoriad cyhoeddus wedi'i lansio fel rhan o Gynllun Llifogydd Llanw Aberteifi, gan wahodd barn ar opsiynau wal llifogydd a mannau cyhoeddus newydd ar lan yr afon.
Nod y cynllun, sy'n cael ei arwain gan Cyfoeth Naturiol Cymru (CNC), yw lleihau'r perygl o lifogydd i ardal Y Strand y dref tra hefyd yn gwella amgylchedd glan yr afon. Mae CNC yn cynnal yr ymgynghoriad i roi cyfle i bobl ddweud eu dweud ar sut gall y cynllun edrych.
Mae'r ymgynghoriad yn canolbwyntio ar ddarn o'r wal lifogydd arfaethedig ar lan yr Afon Teifi ger Castell eiconig Aberteifi, rhwng Pont Aberteifi a'r ganolfan ystafell ymolchi. Mae dau opsiwn yn cael eu hystyried. Mae'r ddau yn darparu'r un lefel o leihau risg llifogydd, ond mae lleoliad y wal yn wahanol - gan effeithio ar led palmant a chynllun y gofod cyhoeddus cyfagos.
Mae’r ymgynghoriad yn gwahodd pobl i roi adborth ar ba opsiwn sy'n well ganddynt, ac i awgrymu y mathau o dirlunio neu nodweddion yr hoffent eu gweld yn cael eu cynnwys. Mae hefyd yn bosibl gwneud sylwadau ar elfennau unigol o'r ddau gynnig.
"Mae'r cynllun hwn yn ymwneud â mwy na dim ond lleihau perygl llifogydd," meddai Paul Isaac, Swyddog Gweithredol Prosiect Cyfoeth Naturiol Cymru. "Rydyn ni eisiau creu gwelliant parhaol i Aberteifi sy'n adlewyrchu'r hyn sy'n bwysig i'r bobl sy'n byw ac yn gweithio yma.
"Dyna pam rydyn ni'n gofyn am adborth nawr - cyn i unrhyw benderfyniadau gael eu gwneud. Gwnewch y mwyaf o’r cyfle yma i ddweud eich dweud."
Mae'r ymgynghoriad yn rhan o gam dylunio manwl y prosiect Mae disgwyl iddo barhau tan ddechrau 2026. Unwaith y bydd y dyluniad wedi'i gwblhau, bydd CNC yn cynnal un ymgynghoriad olaf cyn cyflwyno cais cynllunio i Gyngor Sir Ceredigion. Os sicrhair y caniatâdau a chyllid, gallai'r gwaith adeiladu ddechrau yn hwyrach yn 2026.
Mae'r ymgynghoriad ar agor tan 23 Mehefin. Gall bobl weld y cynigion a dweud eu dweud ar-lein:
Dysgwch mwy a rhannwch eich barn
Gall unrhyw un sydd angen copi papur ofyn am un drwy ffonio 0300 065 3000.
Bydd yr ymatebion i'r ymgynghoriad yn helpu CNC i lunio cynllun sydd nid yn unig yn amddiffyn Aberteifi rhag llifogydd yn y dyfodol, ond hefyd yn gwella glan yr afon Castell Aberteifi am flynyddoedd i ddod.
Gyda 1 o bob 7 cartref a busnes yng Nghymru mewn perygl o lifogydd, a chyda'r argyfwng hinsawdd yn dod â thywydd mwy eithafol, mae'n bwysicach nag erioed bod pobl yn gwybod ac yn deall eu perygl llifogydd.
Mae CNC yn annog pobl sy'n byw mewn ardaloedd sydd mewn perygl o lifogydd, ond nad ydynt wedi profi llifogydd o'r blaen, i gymryd tri cham syml i helpu i amddiffyn eu cartref, eu heiddo a'u teulu rhag effaith ddinistriol llifogydd yn y dyfodol:
- Gwiriwch eich perygl llifogydd drwy god post ar-lein ar wefan CNC
- Cofrestrwch am rybuddion llifogydd am ddim gan afonydd a'r môr yn Gymraeg neu Saesneg
- bod yn barod pan fydd llifogydd yn cael eu rhagweld
Mae Llywodraeth Cymru wedi darparu'r cyllid parhaus ar gyfer y cynllun.