Cyfoeth Naturiol Cymru yn annog ffermwyr i ddilyn rheoliadau wrth wasgaru slyri a thail organig arall

Wrth i’r cyfnod gwaharddedig sy’n gwahardd gwasgaru slyri a rhai mathau eraill o dail organig ar laswelltir ddod i ben ar 16 Ionawr, mae Cyfoeth Naturiol Cymru (CNC) yn atgoffa ffermwyr i gadw at reoliadau a chymryd y rhagofalon angenrheidiol i leihau’r risg o lygredd amaethyddol.

Gall ffermydd ailddechrau gwasgaru o dan Reoliadau Rheoli Llygredd Amaethyddol (CoAPR) Llywodraeth Cymru. Fodd bynnag, mae cyfyngiadau penodol yn parhau tan ddiwedd mis Chwefror i ddiogelu'r amgylchedd.

Mae’r cyfyngiadau’n cynnwys: gwasgaru uchafswm o 30 metr ciwbig o slyri yr hectar neu wyth tunnell o dail dofednod yr hectar ar yr un pryd, a rhaid cael cyfnod o dair wythnos o leiaf rhwng pob gwasgariad.

Mae'n ofynnol hefyd i ffermwyr asesu ffactorau amgylcheddol cyn gwasgaru - fel y tywydd a chyflwr y pridd; agosrwydd at ddyfrffyrdd, llethrau a gorchudd tir - trwy archwilio’r cae cyn gwasgaru.

Mae angen iddynt gynllunio a chofnodi pob gwasgariad i fodloni anghenion pridd a chnydau yn eu Cynllun Rheoli Nitrogen, yn ogystal â chydymffurfio â therfynau nitrogen. Gwaherddir gwasgaru ar bridd dwrlawn, pridd sydd dan ddŵr, wedi'i orchuddio ag eira neu wedi'i rewi, a phridd sydd wedi'i rewi am fwy na 12 awr yn y 24 awr flaenorol.

Mae'r cyfnod gwaharddedig ar gyfer gwasgaru ar dir âr yn parhau tan 31 Ionawr ar gyfer pob math o bridd heblaw am bridd tywodlyd neu bridd bas. 

Dywedodd Simon Griffiths, Arweinydd Tîm Arolygu Llygredd Amaethyddol CNC:

“Efallai bod y cyfnodau gwaharddedig hyn yn dod i ben, ond mae cyfyngiadau eraill yn parhau mewn grym tan ddiwedd mis Chwefror. Rhaid i ffermwyr, tenantiaid, landlordiaid a chontractwyr ystyried yn ofalus yr amodau i benderfynu ar yr amser gorau ar gyfer gwasgaru unrhyw wrtaith organig. Os yw'r amodau'n addas, gall cymunedau ailddechrau gwasgaru. Fodd bynnag, bydd unrhyw achosion o lygredd yn cael eu harchwilio, a bydd camau gorfodi priodol yn cael eu cymryd."

Mae CNC wedi ymrwymo i fonitro cydymffurfiaeth â rheoliadau CoAP a bydd swyddogion yn ymchwilio i adroddiadau am lygredd amaethyddol gan ddefnyddio’r gyfres o offer gorfodi sydd ar gael iddynt. Mae ffermwyr yn cael eu hannog i roi gwybod am achosion o lygredd yn syth i CNC er mwyn lleihau difrod amgylcheddol. Anogir aelodau'r cyhoedd hefyd i roi gwybod am unrhyw arwyddion o lygredd.

I roi gwybod am achosion o lygredd, cysylltwch â CNC ar-lein neu ffoniwch 0300 065 3000.