Dyn o Abertawe wedi cael dedfryd ohiriedig am droseddau gwastraff

Mae dyn o Abertawe wedi cael dedfryd ohiriedig o garchar am adael gwastraff yn anghyfreithlon ar dir o'r enw Erw Las, Llwynhendy, ger Llanelli.

 Cafodd Christian Craig Astill, 37 oed, o Lôn Einon, Penllergaer, Abertawe, ei ddedfrydu i 22 wythnos o garchar, wedi'i ohirio am 18 mis, ar ôl pledio'n euog i adael gwastraff rheoledig ar dir heb drwydded amgylcheddol.

Rhoddwyd y ddedfryd yn Llys Ynadon Abertawe. Gorchmynnodd y llys hefyd i Astill ymgymryd â hyd at 20 diwrnod o weithgarwch adsefydlu a chwblhau 150 awr o waith di-dâl. Cafodd yr achos ei ddwyn yn ei erbyn gan Cyfoeth Naturiol Cymru (CNC) yn dilyn ymchwiliad i adael gwastraff heb awdurdod yn Erw Las rhwng Chwefror 2023 a Mehefin 2024.

Roedd y gwastraff yn cynnwys gwastraff cartref, deunyddiau adeiladu a dymchwel, matresi, eitemau trydanol, plastigau, metel, teiars, dodrefn a gwastraff cymysg arall. Nid oedd gan y safle drwydded amgylcheddol yn awdurdodi gweithgarwch gwastraff.

Mae'r system drwyddedu gwastraff ar waith i sicrhau mai dim ond mewn safleoedd awdurdodedig priodol y caiff gwastraff ei storio, ei drin a'i waredu. Mae gan y safleoedd hyn y seilwaith a'r rheolaethau sydd eu hangen i amddiffyn yr amgylchedd ac iechyd pobl.

Yn ystod archwiliadau a gynhaliwyd gan swyddogion Cyfoeth Naturiol Cymru a Chyngor Sir Caerfyrddin, canfuwyd llawer iawn o wastraff ar draws y safle. Er gwaethaf ymyrraeth gan reoleiddwyr a cheisiadau i gael gwared ar y gwastraff a rhoi’r gorau i weithgarwch heb awdurdod, cafodd rhagor o wastraff ei adael.

Yn ystod yr ymchwiliad, bu Astill yn ymddwyn yn ymosodol ac yn dreisgar tuag at swyddogion CNC, gan arwain at fod angen presenoldeb yr heddlu yn ystod ymweliadau rheoleiddio. O ganlyniad i bryderon a godwyd yn sgil ei ymddygiad a'i hanes cydymffurfio, cymerwyd camau rheoleiddio hefyd i ddirymu ei drwydded cludo gwastraff.

Mae gan Astill euogfarnau blaenorol am droseddau gwastraff, gan gynnwys euogfarnau yn 2021 a 2023 am adael gwastraff rheoledig heb drwydded amgylcheddol. Cafodd y troseddau blaenorol hyn eu hystyried ochr yn ochr â difrifoldeb a hyd y drosedd gyfredol. Clywodd y llys am ffactorau lliniaru yn ymwneud â chyfnodau o afiechyd a brofwyd gan Astill. Fodd bynnag, parhaodd y troseddu dros gyfnod estynedig, ac roedd y safle yn dal heb awdurdod ar gyfer gweithrediadau gwastraff drwy gydol y cyfnod perthnasol.

Dywedodd Edward Davies, Arweinydd y Tîm Rheoleiddio Gwastraff:

Mae’r achos hwn yn dangos na fydd troseddau gwastraff yn cael eu goddef yng Nghymru. Mae'r system trwyddedu gwastraff yn bodoli i amddiffyn pobl, cymunedau a'r amgylchedd. Rhaid i unrhyw un sy'n gadael, storio neu’n rheoli gwastraff sicrhau bod ganddyn nhw’r awdurdod cywir ar waith a'u bod yn cydymffurfio â'r gyfraith. Yn yr achos hwn, cafodd llawer iawn o wastraff ei adael ar dir heb drwydded amgylcheddol, er gwaethaf ymdrechion ymgysylltu niferus gan reoleiddwyr.

Gall troseddau gwastraff ddifetha cymunedau, niweidio’r amgylchedd a thanseilio gweithredwyr cyfreithlon sy’n buddsoddi mewn cydymffurfio â rheoliadau amgylcheddol. Rydym yn asesu pob adroddiad lle mae amheuaeth o droseddau gwastraff, ac yn cymryd camau gweithredu lle bo’n briodol, yn gymesur ac wedi’i gefnogi gan y dystiolaeth sydd ar gael.

Gall unrhyw un sy'n amau gweithgarwch gwastraff anghyfreithlon roi gwybod amdano i linell gymorth digwyddiadau CNC ar 0300 065 3000 neu drwy wefan CNC.