Beth i'w wneud cyn i chi wneud cais am drwydded Cyfarpar Hylosgi Canolig (MCP) annibynnol â mewnbwn thermol o rhwng 1 a llai nag 20MW
Mae'r dudalen hon yn dweud wrthych sut i baratoi eich cais am drwydded MCP annibynnol.
Rhaid i chi ddarparu'r wybodaeth ganlynol gyda'ch cais am drwydded:
- Sgrinio asesiad modelu ansawdd aer
- P'un a yw eich MCP wedi'i leoli o fewn Ardal Rheoli Ansawdd Aer (AQMA) ai peidio
- Crynodeb annhechnegol
- Cadarnhad bod gennych system reoli ysgrifenedig ar waith
- Tystiolaeth i ddangos eich gallu fel deiliad trwydded (y gweithredwr)
Sgrinio asesiad modelu ansawdd aer
Bydd angen i chi benderfynu a yw'r allyriadau aer o'ch MCP yn risg i unrhyw safleoedd cynefinoedd gwarchodedig sy'n agos at eich MCP. Mae'r rhain yn cynnwys Safleoedd Ramsar, Safleoedd o Ddiddordeb Gwyddonol Arbennig (SoDdGA), Ardaloedd Cadwraeth Arbennig (ACA), Ardaloedd Gwarchodaeth Arbennig (AGA) a Pharthau Cadwraeth Morol.
Gallwch ddefnyddio ein map o ddata amgylcheddol i chwilio am safleoedd cynefinoedd gwarchodedig trwy ddewis ardaloedd gwarchodedig o'r rhestr haenau.
Defnyddiwch ein map data amgylcheddol
Bydd angen i chi ddefnyddio'r pellteroedd sgrinio yn y tabl isod i nodi unrhyw safleoedd cynefinoedd gwarchodedig sy'n agos at eich MCP. Bydd y pellteroedd sgrinio yn dibynnu ar faint eich MCP a’r math o danwydd a ddefnyddir ganddo.
Pellteroedd sgrinio lleiaf i'r safleoedd cynefinoedd
|
Y math o danwydd a ddefnyddir |
Mewnbwn thermol graddedig (MWth) o unrhyw MCP |
Pellter lleiaf o MCP i Safle o Ddiddordeb Gwyddonol Arbennig (SoDdGA) neu Barth Cadwraeth Morol (metrau) |
Pellter lleiaf o MCP i Ardal Cadwraeth Arbennig (ACA), Ardal Gwarchodaeth Arbennig (AGA) neu wlyptir Ramsar (metrau) |
|---|---|---|---|
|
Nwy naturiol, olew nwy a biomas solet prennaidd |
1 i 2 |
750 |
750 |
|
Nwy naturiol, olew nwy a biomas solet prennaidd |
2 i 5 |
1,000 |
1,000 |
|
Nwy naturiol, olew nwy a biomas solet prennaidd |
5 i 10 |
1,500 |
1,500 |
|
Nwy naturiol, olew nwy a biomas solet prennaidd |
10 i 20 |
2,000 |
2,500 |
|
Nwy naturiol, olew nwy a biomas solet prennaidd |
20 i 50 |
2,000 |
5,000 |
|
Nwy heblaw nwy naturiol |
1 i 2 |
1,000 |
1,000 |
|
Nwy heblaw nwy naturiol |
2 i 5 |
1,500 |
1,500 |
|
Nwy heblaw nwy naturiol |
5 i 10 |
2,000 |
4,000 |
|
Nwy heblaw nwy naturiol |
10 i 20 |
2,000 |
5,000 |
|
Nwy heblaw nwy naturiol |
20 i 50 |
2,000 |
10,000 |
|
Olew tanwydd trwm solet a hylifol |
1 i 2 |
2,000 |
2,000 |
|
Olew tanwydd trwm solet a hylifol |
2 i 5 |
2,000 |
4,000 |
|
Olew tanwydd trwm solet a hylifol |
5 i 10 |
2,000 |
8,000 |
|
Olew tanwydd trwm solet a hylifol |
10 i 50 |
2,000 |
10,000 |
MCPs yn gweithredu y tu allan i'r pellteroedd sgrinio lleiaf
Os yw eich MCP yn gweithredu y tu allan i'r pellteroedd sgrinio gofynnol a roddir yn y tabl uchod, mae eich MCP wedi'i ‘sgrinio allan’ ac felly nid oes angen i chi gynnal unrhyw asesiadau modelu ansawdd aer i gefnogi'ch cais.
Os yw eich MCP wedi cael ei ‘sgrinio allan’ ond ei fod yn eneradur penodedig, â mewnbwn thermol ar ei ben ei hun o fwy nag 20MW, neu'n llosgi 50kg neu fwy yr awr o fiomas gwastraff, ewch i:
Beth i'w wneud cyn i chi wneud cais am Gyfarpar Hylosgi Canolig (MCP) annibynnol sydd â mewnbwn thermol o lai na 50MW ac sydd hefyd yn Eneradur Penodedig (SG) neu weithgaredd Rhan B (cynhwyswch ddolen).
MCPs yn gweithredu o fewn y pellteroedd sgrinio lleiaf
Os yw eich MCP yn gweithredu o fewn y pellteroedd sgrinio lleiaf i’r safleoedd cynefinoedd gwarchodedig a roddir yn y tabl uchod, bydd angen i chi ddefnyddio’r offeryn sgrinio hylosgi SCAIL i benderfynu a yw’r allyriadau aer o’ch MCP yn risg i’r safleoedd cynefinoedd gwarchodedig a nodwyd gennych ac a oes angen i chi wneud asesiad manylach ohonynt. Bydd angen i chi fewnbynnu'r pellteroedd sgrinio perthnasol o'r tabl uchod i'r offeryn sgrinio hylosgi SCAIL.
Er mwyn defnyddio offeryn sgrinio hylosgi SCAIL, mae angen gwybodaeth arbenigol arnoch am asesu ansawdd aer a modelu gwasgariad, felly efallai y bydd angen i chi ddefnyddio ymgynghorydd i gwblhau hwn ar eich rhan. Gall hyn gymryd ychydig wythnosau i'w gwblhau, felly bydd angen i chi ei gwblhau cyn gwneud eich cais.
Gallwch ddod o hyd i ymgynghorydd yng Nghyfeiriadur ENDS. Bydd yn codi tâl am ei wasanaethau.
Os gall eich MCP fodloni’r Gwerthoedd Terfyn Allyriadau (ELV) MCP ‘newydd’ a nodir yn y tabl perthnasol yn Atodiad II i’r Gyfarwyddeb Cyfarpar Hylosgi Canolig (MCPD), gallwch fewnbynnu'r gwerthoedd hyn i’r offeryn sgrinio hylosgi SCAIL i ddangos effaith risg isel ar yr amgylchedd.
Os byddwch yn datgan yn wirfoddol y gall eich MCP fodloni’r Gwerthoedd Terfyn Allyriadau (ELV) MCP ‘newydd’, byddwn yn cynnwys y terfynau hynny yn eich trwydded, y bydd angen i chi gydymffurfio â hi o 1 Ionawr 2025.
Gallwch ddatgan yn wirfoddol y gall eich MCP fodloni'r terfynau hyn yn eich ffurflen gais.
Os na fyddwch yn datgan y gall eich MCP fodloni’r Gwerthoedd Terfyn Allyriadau (ELV) MCP ‘newydd’, byddwn yn cynnwys terfynau cyfarpar ‘presennol’ (sy'n berthnasol i'ch MCP) yn eich trwydded, y bydd angen i chi gydymffurfio â hi o 1 Ionawr 2025.
Offeryn sgrinio hylosgi SCAIL
Mae offeryn sgrinio hylosgi SCAIL ar gael ar wefan y Ganolfan Ecoleg a Hydroleg (CEH), a ddefnyddir gan holl reoleiddwyr y DU ar gyfer asesu boeleri, injans, generaduron a thyrbinau.
Ewch i’r offeryn SCAIL ar wefan y Ganolfan Ecoleg a Hydroleg (CEH)
Mae canllaw cyffredinol i ddefnyddwyr yr offeryn sgrinio hylosgi SCAIL ar gael ar wefan y Ganolfan Ecoleg a Hydroleg i'ch helpu i gwblhau'r offeryn.
Bydd yr offeryn sgrinio hylosgi SCAIL naill ai'n ‘sgrinio allan’ neu'n ‘sgrinio i mewn’ eich MCP.
Os bydd eich MCP yn cael ei ‘sgrinio i mewn’ gan yr offeryn sgrinio hylosgi SCAIL, bydd angen i chi gynnal asesiad modelu ansawdd aer safle-benodol sy'n asesu'r risgiau i'r cynefinoedd gwarchodedig a chyflwyno hwnnw gyda'ch cais am drwydded.
Mae asesiadau modelu ansawdd aer yn gofyn am wybodaeth arbenigol felly bydd angen i chi ddefnyddio ymgynghorydd amgylcheddol i wneud hyn ar eich rhan. Gall hyn gymryd ychydig wythnosau i'w gwblhau, felly efallai y byddwch am wneud hynny cyn gwneud eich cais.
Gallwch ddod o hyd i ymgynghorydd yng Nghyfeiriadur ENDS. Bydd yn codi tâl am ei wasanaethau.
Cysylltwch â Cyfoeth Naturiol Cymru os ydych am wneud eich modelu manwl eich hun.
MCPs wedi’u lleoli o fewn Ardal Rheoli Ansawdd Aer (AQMA)
Os yw eich MCP wedi’i leoli o fewn Ardal Rheoli Ansawdd Aer (AQMA), rhaid i chi ddarparu:
- Manylion yr AQMA
- Allyriadau gwirioneddol o'ch MCP
Darganfyddwch a ydych mewn Ardal Rheoli Ansawdd Aer ar wefan DEFRA
Byddwn yn ymgynghori â'r awdurdod lleol i wirio a yw eich MCP wedi'i nodi yn y Cynllun Rheoli Ansawdd Aer cysylltiedig ac, os ydyw, mae'n bosibl y bydd eich allyriadau MCP yn cael eu nodi fel rhai sy'n effeithio'n andwyol ar ansawdd aer yn yr ardal.
Bydd yr awdurdod lleol, yn ei gynllun, yn nodi faint llymach y mae angen i'r Gwerthoedd Terfyn Allyriadau (ELVs) fod er mwyn sicrhau gwelliant amlwg i ansawdd aer. Byddwn yn cynnwys yr ELVs llymach y cytunwyd arnynt yn amodau eich trwydded.
Crynodeb annhechnegol
Bydd angen i chi ddarparu crynodeb sy'n esbonio eich cais, mewn iaith annhechnegol gymaint â phosibl, gan osgoi termau technegol, data manwl a thrafodaeth wyddonol. Dylai hwn gynnwys crynodeb o'r safle a chrynodeb o'r safonau technegol allweddol a'r mesurau rheoli sy'n deillio o'ch asesiad risg.
Os yw eich cais am gyfarpar symudol, rhaid i chi ddweud wrthym sut y gallai'r gweithgareddau rydych am eu cyflawni effeithio ar ansawdd y tir a disgrifio symudedd eich cyfarpar a sut rydych yn bwriadu gweithredu.
Cadarnhad bod gennych system reoli ysgrifenedig ar waith
Rhaid bod gennych system reoli ysgrifenedig effeithiol ar waith sy'n nodi ac yn lleihau'r risg o lygredd. Gallwch ddangos hyn drwy ddefnyddio cynllun ardystiedig neu'ch system reoli eich hun. Mae eich trwydded yn ei gwneud yn ofynnol i chi (fel y ‘gweithredwr’) sicrhau eich bod yn rheoli a gweithredu eich gweithgareddau yn unol â system reoli ysgrifenedig.
Gofynnir i chi gadarnhau eich bod wedi darllen y canllawiau a bod eich system reoli yn bodloni ein gofynion yn y ffurflen gais.
Tystiolaeth i ddangos eich gallu fel deiliad trwydded (y gweithredwr)
Wrth benderfynu ar eich cais, rhaid i ni ystyried a fyddwch yn ddeiliad trwydded cymwys (‘gweithredwr’). Byddwn yn edrych ar eich gallu technegol ac ar a ydych wedi'ch cael yn euog o drosedd berthnasol. Trosedd berthnasol yw un sy'n ymwneud â'r amgylchedd neu reoliad amgylcheddol.
Byddwn hefyd yn gwirio i weld a ydych wedi'ch datgan yn fethdalwr neu'n ansolfent a gallwn wirio eich sefyllfa ariannol trwy wiriad credyd. Byddwn hefyd yn gwirio bod gennych system reoli ar waith.